Rondika hêvîdar
bi te re
çiqas xweş e jiyan
bi te re
hesret dibe hevdîtin
dûr dibe nêzîk
çol dibe avî
dil dibe evîndar
evîn dibe tu
tu azadî û pêşeroj
tu xewn û xeyalên zaroktî
yên di dil de kom bûne
ji Med û vir ve
agir bi te bilind dibe
li navseran
bi te hişîn dibe giya
bi navê te distirên
kew û bilbilên zozanan
rengê xwe ji te digrin
kulîlkên nîsanê
tu xwîn î
di hemû dilan de dikelî
tu xema zindiyan
qibleya şehîdan
bêriya te dikim
di roj û şevan de
tu rondika
ji çavê min dibarî
ser perîkên
kevoka baskşikestî
tu lêvkeniya zarokên pêxwas
terisîna keziyên hûnandî
zaroka
di sînga dayikê de
berba bûye
li cîhanê yî
gul ji te digire bîna xwe
roj şadiya dilê te
şev keserên nava te ne
av zelaliya peyvên te
ba mizgîniya hêviyên te
bi xwe re tîne
tu li ku yî îroj
kî dizane
di hilma tê kêşandin de
di giyana dide jiyandin de
di ramana bi hestan hûnandî de
di ku de
di tevan de
an di bîr û baweriyan de
gelo kî dizane
dîrok an pêşeroj
mirov an xweza
yan jin dizane